| ２００８年７月３１日
香港歷史 |
哩幾日無意中在維基百科睇到二次大戰的資料，明白到中國自從二百年前左右清朝的雍正開始國力衰落，到1840年代，外國人喜歡中國的茶葉、絲綢，而清朝自以為無需要輸入外國商品，導致外國貿易逆差。英國為左解決這個貿易問題，於是輸入大量毒品（鴉片）到清朝，清朝人民及官員中毒上癮，於是對鴉片需求越來越大。有清朝大臣意識到問題越來越大，便進諫給皇帝，皇帝亦派林則徐往廣州（當時廣州是對外商貿的重地）消滅所有鴉片。英國大為不滿，派軍隊攻打廣州，卻被林則徐指揮的清軍打敗。於是英軍流放消息，陷害林則徐，皇帝亦將林則徐發配邊疆。英國繼續進攻，清朝節節敗退。英軍第一次打敗清兵時，簽定南京條約，將香港島割讓俾英國。後來英國再攻打清朝，清朝再戰敗及簽定北京條約，將九龍半島割讓給英國。後來英國再向清朝租借新界，為期99年。後來幸好中國國力越來越強，才有能力跟英國談判要回香港島及九龍半島，並於1997年連同新界一齊回歸中國。
雖然哩ｄ歷史，中一都讀過晒啦，但係年幼既時候真係冇乜民族意識，對國際大事更加係冇乜點理。其實「八國聯軍」都只係一百年前左右，「二次大戰」、「香港淪陷」都只係五十年前左右既事，世界並未真正完全沒有戰爭… 清朝同埋民國初期咁衰弱，就係因為大家唔團結，自相殘殺。 |
|
| |
| ２００８年７月９日
風險管理主任的工作（序） |
轉左去中銀保險都已經一個星期了，我所做過既工作係：完全冇野做… 話說我第一日返工，上頭已經同我講風管部有４個人，佢係主管，１個做投資相關既風險，１個做信貸相關既風險，佢想我主要做保費、賠償相關既風險… 於是就俾左一疊幾十頁紙既 Notes 我睇，內容係 Premiumratemaking…
第一日放工前，我約略睇過講番個 Summary 俾佢，原來佢已經睇過… 之後佢又俾左幾份野我睇… 第二日又叫同事 Print左幾疊野我睇… 於是我哩幾日就係不斷睇不斷睇… 佢仲叫我返 Polyu 借書添！主要係借ｄ計汽車保險保費、執底同埋 NCD 既書…
其實我有問過ｄ同事，問我上一手係做ｄ乜既，佢地話我上一手既野已經分配晒俾佢地兩個做，而且佢地亦都唔係好多野做… 真係奇怪，咁請我做乜呢？
兒家每日都係不斷咁睇書，真係好眼訓！令我諗返起以前讀緊大學果陣去德豐做暑假工，果陣又係叫我睇VC++、VB果ｄ書，果陣我每３分鐘就睇一次時間，好多時真係睇睇下訓著左…（個位尚算偏僻，但老細有時會行過…） 兒家，我都好想訓覺… 可惜個位好近總裁間房…… 而且又近茶水間……
總括黎講，我兒家做緊既野就係坐o係自修室度連續溫９個鐘頭書！ |
|
| |
| ２００８年６月２６日
佳保Last Day |
自從上個月交辭職信之後，總覺得哩個月過得超級慢… 終於等到今日喇！哩幾日都落好大雨，搞到平時好塞車既東區走廊比平時更加塞車！所以哩幾日我都遲半個鐘先返到公司…
講番大前日（星期一），係腦細去旅行前夕，所以我果日特登走入去搵佢講最後果期糧既安排（我有錄佢音，因為知佢成日講過既野搵藉口唔算數），之後佢就請大家食下午茶喇。
最後哩３日都超級 Free！因為腦細唔o係度，加上冇乜野做！今日腦細既親信冇乜野俾我做，佢亦都好早去左律師樓，我就更加 Free添！放工後，同事請我去左華記飲野，當係同我慶祝 Last day 咁喎，佢地主要都係同我講番 Hanson 其實係腦細ｄ親戚（兒家先講=_=），負責報寸俾腦細，所以佢地平時吹水都會好細聲，仲講左好多腦細既惡行。咁我問點解佢地又唔走呢？佢就話腦細拖住佢地ｄBouns，上年果ｄ都仲未俾，又話要分開兩次俾，俾完第一份，第二份又話要睇番佢地既表現，所以佢地好不滿，但係又唔可以全身而退… 佢地都記錄左腦細既罪證，諗住隨時同佢玩獲大既… 佢地記錄左辦公室上面個暗格ｄ消防設備，又記錄左賓賓在辦公室工作，又抄底晒ｄ客既聯絡，因為其實律師樓係唔俾接公證行ｄ客既，客同埋公證行既合約亦都冇法律效力，客人其實唔應該俾 25% 服務費既！所以佢地話，如果腦細再玩野，佢地就會反擊！
佢地仲話，個奸細（腦細個親信）同腦細ｄ野成日都鬼鬼鼠鼠咁講好多野、一齊去好多場合，奸細每 Close 一隻 BI File，就有 $500獎金（我到兒家先知！），所以哩個職位，腦細係唔會俾其他人做既，亦都唔會分獎金俾其他人，所以其實我係白做既！
聽左好多野，到左７點先走，於是盡快趕去灣仔間「八喜」，因為約左 QBE 舊同事食飯（ Felix 生日）
|
|
| |
| ２００８年６月２４日
PS3 異魂傳承 Folklore |
PS3 比起上一代既 PS2 主機，其中一個重大改良就係支援 Internet！PSN (Playstation Network)時不時都會放ｄ新 Trailer、新 Demo 俾人下載試看試玩！好耐之前下載左哩隻 Folklore 既Demo，已經覺得個故仔好靈異、ｄ音樂好鬼秘、遊戲畫面亦很流暢(720p + 30fps)！
故事講述女主角 Ellen 收到失蹤多年的母親來信，相約在都靈村希之涯見面，而男主角雜誌記者 Keats亦收到一封暱名信指有事發生而來到都靈村。但他們在希之涯看到的，只是一具屍體而已… 由於天色已晚，他們就在都靈村住一晚。而 Ellen 和Keats 都分別聽到一些呼喚而到去都靈村的酒吧，酒吧內的靈體教 Ellen怎樣去異界見已死的人，於是展開了在異界的冒險。終於在異界某處見到在希之涯的死者，她指責 Ellen 算什麼女兒… 而 Ellen 亦不知所措…Game Demo 亦就此完結…
由於咁呆引，終於等到隻 Game 跌到落 $300便買了來玩！原來個故事並唔係咁簡單！人物唔係多，地方亦唔係大，但係ｄ關係就好覆雜… 玩左 20個鐘左右，終於爆左機，亦知道晒成個故事既來龍去脈… 哩隻 Game 真係冇買錯！非常之值得推薦！在此唔講咁多個故事喇，等大家自己玩啦！
|
|
| |
| ２００６年６月１０日
保險賠償部、公証行的工作 |
黎緊７月我就會轉去中銀做風險管理主任，我諗唔會被昆係賣單果ｄ乜乜管理顧問掛... 雖然我兒家未至於叫做轉行，但就係轉左去完全唔同既部門度做野... 所以我兒家寫低我哩兩年在保險賠償既工作啦！
而汽車保險以保障範圍分類的話有３類：
１）第三者人身傷亡責任保險
２）第三者責任保險（俗稱三保）
３）綜合保險（俗稱全保）
香港政府規定每個車主都要為自己部車買第１類既保險，即係如果駕車唔小心撞到人，你既保險公司都會賠俾（當然係講緊你合乎晒所有苛刻既條款先啦）果個人，即係所謂既第三者。如果係撞到人地架車，咁就要買第２類先會幫你賠喇。至於全保，就係包埋自己架車既維修費，咁保費梗係貴好多啦，抵唔抵就真係見人見智喇！
香港既汽車保險公司有差唔多１００間，市場佔有率最高既係中銀、AXA、民安，都有雙位數字佔有率，其次既係太平洋、QBE、Zurich等等，而最衰格既汽車保險公司係星輝同埋泰加！
我以前做既QBE，雖然唔入三甲，但已經超多野做！一個鐘大約廿、三十電話，ｄ信、Fax就不斷咁有，所以我通常都係將ｄ同類既野儲埋一次過做... 我會將我管轄既全保 Case 優先處理，收到 Claim Form就幫佢安排公証行睇車影相，當收到公証行報告（如果冇特別的話）就即刻同佢打開工紙同滿意紙，我地連支票都要自己準備埋搵人簽名寄埋出去...（乜支票唔係會計部搞架咩？） 當收到警方信件話係對方不小心，咁就要幫佢追埋對方；如果係我地個客不小心，咁就會交俾同事去搞大架喇；如果兩邊都冇告不小心，咁就由得佢，乜都唔駛做！（除非個客話要 Close File...） 工作當然唔止咁少啦，仲有好多 Paper Work 同埋好多 SpecialCase... 又有好多麻煩客...
至於兒家做緊既公証行係細公司，當有人打電話來話撞左車想睇車影相同埋做追討、又或者車房打電話來介紹客人，我地都會首先幫個客架車影左相先，見同事渣架車出去影相都不知幾開心！公証行既角色係介乎客人同車房之間，將車房既維修報價，調查至合理水平；例如要維修車頭燈，就打去原廠、雜廠問幾錢，再查書，睇睇維修／換車頭燈需要幾多個鐘，再乘番人工，同埋仲要查埋 MarketValue。報告就主要係咁做啦，當然有並他例如 Total Loss、Damage Access Report 等等既變化啦...
學老細話，做報告只係前菜，追償先係主菜！做報告只係收800蚊，但係追償就係賠償金額既25%... 例如追到10萬，就收個客2萬5... 超好賺！如果司機冇受傷，咁就易做啦，以前在QBE都學過；如果司機乘客有受傷，仲簡單... 交俾律師做... 所以我兒家學到既野唔多，只係識得ｄ流程：將 Personal Injury Practice Direction 18.1 個 List 所要既文件交晒俾律師，等律師 LetterBefore Action、等律師約 Medical Exam、等律師出 Writ、等律師上 Check List Review、等Trial... 等賠錢、等收錢...
有兩樣野係值得讚個老細，就係佢哩十幾年為公司建立既口碑、同埋佢把握兒家ｄ人鍾意用Internet Search 野！口碑可以令每日都會有車房打電話來話有客要整車，順手搵我地影相；而佢把握兒家ｄ人鍾意用 InternetSearch 野，在 Yahoo 一打撞車兩個字就會出左我地公司個網頁，所多客都係話 Internet Search到我地既！基於以上理由，我地係唔駛搵客（唔似得有ｄ大行要在醫院、警署等客），老細只要請幾個人幫手跟 File就已經係唔駛自己做已經自動有錢收！值得學習！
有一樣野要留意，就係公証行並唔係真係公正，佢地有ｄ會偏幫保險公司既；亦有公証行為左同車房之間既關係，有少少偏幫車房... 所以唔好信晒所謂既公証行！
仲有一樣野要留意，就係好多時明明係對方小路出大路，但係我方係電單車、傷得特別重、賠亦賠得應該要好多，但對方保險公司偏偏就幫佢自己既司機打甩不小心駕駛... 總之... 在香港有錢就請一個好ｄ既律師啦...
|
|
| |
